PAŽNJA! PAŽNJA!
Danas (i to samo danas) odlučio sam se objaviti do sad nikad objavljenu priču, zasnovanu na istinitim događajima koja su se dogodila JUČER i pred neki dan na području Kvarnera. O tome nisam još nikome pričao, ali sam odlučio o tome progovoriti sada. Ovo je jedno veliko svjedočanstvo i nipošto nije da mi je dosadno i da idem tu pobacat malo svoje art fotke uz obavezni spam text, naprotiv i dapače, ovo ozbiljna i realna priča koja će mnoge od vas natjerati da RAZMISLITE o nekim stvarima u životu u ova turobna i izazovna vrijemena u kojima smo mi sada trenutno.
Pa evo da ne okolišam više evo prelazimo na temu evo odmah i evo reći ću vam kako je to bilo, ja da ča, ma morebit da me nećete baš svi razumit a ča da van rečen, vero van ja tu ne moren pomoć.
🌿🌿🌿
Niš, taman san bil vičeral, vidin mat me zove, pita ko ću moć segutra prit va ulike. Mislin si...a ča da joj čovik reče na takove bedastoće, aš zna i ona i ja da to ni bilo pitanje, nego da moran poć pul Veje. I niš...kako i svakoga leta, prišal je još jedan štajun od ulike, ma je bilo lipo vidit pol fameje na kup, i to vero kako tuka - va drmun.
Stara Pežola je od deda, ne znan zač ju niki ni otpejal na ploj, ma kad ju vidin, spametin se kako san šnjin šal na Glavatok na ribe. Brenze od Pežole nisu delale kako tuka, i na onaj veli bok kadi se Cres vidi, tamo bi ded počel hitat va nižu (getriba pul timuna) i pumpat brenzu da ćapa do pred kraj boka.
Ne znan ča da rečen oko ulik, aš svejeno se vi ovdeka vero va sve razumite, ča ne? Ja da ča. Niš, ulike su dobro hitile ovega leta, nećemo pedikulat aš ih nismo baš ni tendili da vam pravo rečen. Sorte su neke stare domaće ča su njihovi dedi nosili od Cresa, a mat ni otela sadit ove moderne talijanke va drmun, tako da se nabralo oko 150 kil od dvajset ulik, ko nas onajsti zgorika bude pogjedal more da će bit 15 litri ako maslina plati kako tuka.
I niš, zjutra san moral neš poć va Istru, a već kad san šal na tu bandu, siguro sigurato da san šal va Rovinj, aš san bil Rovinjež pred deset let ma meni je to zavavik ko da je bilo čera. Pejal san uz more da vidin ko je gužva na Plomin, aš svi sad povedaju da će se ona oštarija tamo zaprt. Inače vero ne pasivan tuda često aš je po te ceste andrijoman veli šušur, ma svaki put mi pasa kroz glavu...oštrigeca kakova je to cesta, sakramentadi da je. Znan da nisan niš novega tu rekal, ma svejeno san moral to reć, ča sad kurac ča pršćete dobra je cesta i za gjedat i pejat, moral san to opet reć.
Va Istre još vavek čekaju da se torna onajsti Tito, ne znan ča bi o tome rekal, bi mogal njima ki ča reć da niš od toga? Pametnije bi bilo zasukat rukavi, pasat dva tri tira po kampanji zi plugon nego njurgat da se torna ovajsti ili onajsti. Ča ja znan to je neko moje mišljenje ma morebit da san u krivo, ne znan. Ki će ga znat.
Va Rovinjsko Selo kad san videl Fumu počel san plakat standard, a kad san prišal na Valdiboru va oba oka mi se storilo vode ko pred ki dan va Riku ča je napadalo. Ma vero brzo san se trgnul nazad kad san čul da niki oko mene ne poveda istrijanski, vero više se čuje albanski i po novemu filipinski. Prehitilo me to nazad i nastavil san se jadit na svih i sve oko sebe ko ča obično delan. Nisan dugo stal va Valdiboru aš nis otel da me opet strefi balega od galeba. Jenega dana dok san bil rovinjež, šli smo žena i ja na kafe, obukal san stomanju i sve kako tuka, i kako san sel va kafić (Valentino) tako me galeb posral na rame. Od tega dana više ne moren čut onu bedastoću ča je Oliver kantal.
Šal san jist va Končetino, ma ga nisan našal kade je nekad bil (ča je zaprto?), pa san lačan šal slikat malo po gradu. Samo bin vas zamolil da mi ne pršćete kako ste ovakove slike vidili miljar put, aš da van pravo rečen mene vam se to ne tiče, ko će ki gljedat moje slike neka gljeda, ko neće ne mora, tr ni kopat.
Niš, san moral partit ća, ma san isto tako moral nič pojist. Kamo drugamo poć jist nego kamo jist gremo mi domaći đente di mare rovinježi. Ala šu vi turisti hitite ovo va mobitel, ko ča ste otkrili pašaretu va Flanone ala sad kad budete šli va Rovinj hote zet jeni ovaj fanjski sengvić Pingvino, va Pingvino. Ja san šal na tašće i pravo da van rečen, ni mi baš bilo dobro potle, malo mi je teško palo na štumig, ma nema veze to san ja kriv.
Doma san šal okolo preko Pazina zgoruboku na Gračišće aš je to vero lip kraj. Va Pazin se sve nič kopa, dela, interesantno da se sad i crikve delaju, skele oko zvonika itd. Nećemo oko toga delat šušur, aš to je samo delo, ne dela se to zato da se ne jade naši novi susedi da ne gljedaju va naš križ i takove stvari, takove bedastoće ganaju ovi kanjoli ča veruju va ravne zemlje, ča se nisu badali zadnja tri leta, njih ne abadajte.
I ča, niš. Stal san po putu pul niki lipi trsi, malo ih poslikat, i šal doma, ča je tu još za reć - vero niš.
Ala šu.